Küçə ticarəti ilə məşğul olanlara alternativ imkanlar təqdim ediləcək - Baku TV

Ölkəmizdə piyada səkilərində, xüsusilə də metro çıxışları və bazar ətraflarında küçə ticarətinə tez-tez rast gəlinir. Maraqlıdır ki, cəmiyyətdə satışın bu formasına münasibət birmənalı deyil. Belə yerlərdən mütəmadi alış-veriş edənlərlə yanaşı, antisanitar və qeyri-qanuni şəraitə görə küçədən qida və ya digər məhsulları almaqdan imtina edənlər də az deyil.

Azad İstehlakçılar Birliyinin sədri Eyyub Hüseynov məsələ ilə bağlı bildirib ki, alıcılar hər zaman mal və xidmətlərə tez əlçatanlığın tərəfdarıdırlar və küçə ticarəti əksər hallarda bu tələbatı ödəyir. Lakin ekspert bu sahədə ciddi nizam-intizamın yaradılmasının vacibliyini vurğulayır:

"Mən bir çox xarici ölkələrdə küçə ticarətinin şahidi olmuşam. Lakin həmin ölkələrdə bu prosesi yerli bələdiyyələr təşkil edir. Məsələn, Fransada bələdiyyə tərəfindən müəyyən edilmiş ərazidə saat 12:00-a qədər balıq satışına icazə verilir. Ayrılan vaxt bitdikdən sonra ərazi dərhal təmizlənir və küçə ticarətinə yekun vurulur. Azərbaycanda isə bu proses hələ xaos xarakteri daşıyır, piştaxtalar piyadaların hərəkətini məhdudlaşdırır".

Artıq ölkəmizdə də bu sahədə müvafiq addımların atılması planlaşdırılır. Belə ki, yerli icra hakimiyyəti orqanları küçə ticarəti ilə məşğul olan şəxslər üçün layiqli iş şəraiti yaradacaqlar. Bu bənd Nazirlər Kabineti, Azərbaycan Həmkarlar İttifaqları Konfederasiyası və Azərbaycan Respublikası Sahibkarlar (İşəgötürənlər) Təşkilatları Milli Konfederasiyası arasında imzalanmış 2026–2028-ci illər üçün Baş Kollektiv Sazişdə öz əksini tapıb.

Qeyd olunub ki, vətəndaşların sosial müdafiə hüquqlarının təmin edilməsi nəzərə alınaraq küçə və bazar ticarəti ilə məşğul olan şəxslər üçün yerli icra hakimiyyəti orqanları və bələdiyyələr tərəfindən layiqli iş şəraitinin yaradılması istiqamətində müvafiq işlərin aparılması zəruri hesab edilib.