Mamed və Məmməd adlarının qoyulması qadağan olunur?

Yeni doğulan körpələrə “Mamed” və ya “Məmməd” adı qoymaq istəyənlər üçün xəbərimiz var. Sosial şəbəkələrdə yayılan xəbərə görə, bu adların qoyulması artıq qadağan edilir. İddia olunur ki, belə bir qərar Terminologiya Komissiyası tərəfindən verilib.

Məsələ ilə bağlı sözügedən komissiya ilə əlaqə saxladıq. Terminologiya Komissiyasının sədr müavini Sayalı Sadıqova sosial şəbəkələrdə yayılan xəbərləri təkzib edib: “Bu məlumatlar yalnışdır. Terminologiya Komissiyasının məqsədi adlar qoymaq, qeydə almaq deyil. Adlar Ədliyyə Nazirliyinin nəzdində qeydiyyat idarələri tərəfindən qeydə alınır”.

Sayalı Sadıqova onu da bildirib ki, 2015-ci ildə “Məhəmməd”, “Məmməd”, “Mamed” və “Muhammed” adlarının hansının məqsədəuyğun olması barədə müzakirə aparılıb və bu zaman onların “Məmməd” və “Məhəmməd” kimi iki formada yazılışı tövsiyə edilib.