Millət vəkili ictimai nəqliyyatdan gileyləndi

“Avtobuslardan istifadənin 40% azalması kefiyyətin aşağı olması ilə bağlıdır”.

Bunu Milli Məclisin növbədənkənar sessiyası çərçivəsində iyunun 16-da keçirilən növbəti iclasında “Avtomobil nəqliyyatı haqqında” qanunda dəyişiklik edilməsi barədə qanun layihəsinə münasibət bildirərkən deputat Azay Quliyev deyib.

Millət vəkili bildirib ki, müntəzəm marşrut xətləri üzrə hərəkət edən avtobusların sayı gündən-günə azalır. Vətəndaşlar saatlarla avtobus gözləyirlər.

“Elə yaşayış yerləri var ki, həmin yerlərə avtobuslar gedib çıxmır. Daşıma xidməti göstərən sahibkarlar marşrut xəttinin sonuna kimi getməyi qənaətbəxş hesab etmirlər. Biz sahibkarlarla yanaşı, vətəndaşların da maraqlarını qorumalıyıq. Sahibkar az vəsait əldə edəcək deyə insanlar kilometrlərlə yolu piyada qət etməlidir? Bu məsələlər pratiki olaraq həll olunmalıdır”, – deyə A.Quliyev qeyd edib.