Polietilen torbaların istehsalı niyə azalır? - Baku TV

Azərbaycanda marketlərdə alıcılara təklif edilən polietilen torbalar 2023-cü ilin fevralın 15-dən etibarən ödənişlidir.

Məqsəd polietilen torba tullantılarının ətraf mühitə mənfi təsirlərini azaltmaqdır. Bununla da hədəf polietilen torbalardan istifadənin azalmasına nail olmaqdır.

Dövlət Statistika Komitəsinin məlumatına görə, torbalar ödənişli olmamışdan əvvəl ölkədə 12 630 ton polietilen kisə və çanta istehsal edilmişdisə, 2024-cü ilin eyni dövründə bu göstərici 14 245 tona yüksəlib. Lakin 2025-ci ildə istehsal 11 608 tona enib.

Bu günlərdə isə sözügedən torbaların qiymətində artım müşahidə olunur. Belə ki, kiçik həcmli torbaların qiyməti 3 qəpikdən 5 qəpiyə, böyük olanlar isə 5 qəpikdən 7 qəpiyə yüksəldilib.

Qeyd edilənlər qalınlığı 15-50 mikron aralığında olan polietilen torbalara aiddir. Qalınlığı 15 mikrondan aşağı olan belə torbaların isə idxalı, istehsalı, həmçinin ticarət, ictimai iaşə və digər xidmət obyektlərində istehlakçıya satılması və ya verilməsi qadağandır.