Qızılıcaya görə məhdudiyyət olacaq?

Qazaxıstan vətəndaşlarına qızılcadan qorunmaq üçün yenidən maska rejimi bərpa edilib.

Gürcüstanda isə qızılcaya yoluxma hallarında kəskin artım müşahidə edilir. 2024-cü ilin təkcə yanvar ayında təsdiqlənmiş yoluxma hallarının sayı 16-dır.

Bəs ölkəmizdə vəziyyət necədir? Nəzərə alsaq ki, Azərbaycanda da xeyli sayda azyaşlı və yeniyetmə qızılcadan vəfat edib.

Həkim Vasif Əliyev bildirib ki, qızılca virusunun yüksək yoluxduruculuq qabiliyyəti olduğuna görə rahatlıqla bir insandan başqa insana keçə bilir:

“Ölüm sayları bizdə də az deyil, 10-dan çox uşaq qızılcadan dünyasını dəyişib. Çox güman ki, xəstəxanaya da gec çatdırılır. Ev şəraitində müalicəyə üstünlük verildiyi üçün uşaqların vəziyyəti ağırlaşır. Buna görə də çox vaxt həyatlarını xilas etmək mümkün olmur”.

Həkimlər ölkəmizdə də qızılcaya yoluxma hallarının artacağı təqdirdə hər hansı məhdudiyyətin tətbiq olunacağını istisna etmirlər.

Səhiyyə Nazirliyindən isə qeyd edilib ki, görülən tədbirlər nəticəsində yanvar ayından etibarən qızılca virusuna yoluxmada azalma müşahidə edilir.

Qeyd edək ki, təkcə fevral ayında iki azyaşlı qızılcadan dünyasını dəyişib.