Qubada məktəbin sinif otaqlarına şəhid adları verildi

Vətən müharibəsi qəhrəmanlarının xatirəsinin əbədiləşdirilməsi, onların vətənpərvərlik tərənnümü məqsədilə Quba rayonu, Rövşən Mütəllimov adına Bağbanlı qəsəbə tam orta məktəbinin bütün sinif otaqlarına şəhid adları verilib.

Otaqların qarşısında Azərbaycanın müstəqilliyi və ərazi bütövlüyü uğrunda canlarından keçən qəhrəman oğulların fotoları və onlar haqqında məlumatlar yer alıb.

Baku TV-yə danışan şəhid atası Məcnun Baxşıyev qəhrəmanlarımızı unutmadıqlarına görə məktəb müəllimlərinə təşəkkürünü bildirib:

“Oğlum Baxşıyev Vahid 44 günlük Qarabağ müharibəsinin şəhididir. Kəşfiyyatçı olub, 21 yaşında şəhid olub. Subay uşaq idi. Murovdağda şəhid olub. Allah dövlətimizi, prezidentimizi qorusun. Təzə tikilən məktəbdir. Allah müəllim kollektivinin canını sağ eləsin ki, belə bir şərait yaradıblar. Şəhidlərimizi unutmurlar”.

Qeyd edək ki, şəhid Rövşən Mütəllimovun adını daşıyan təhsil ocağında ümumilikdə 40-a yaxın şəhidin adı siniflərə verilib.