"10 manatlıq bilet üçün deyirlər ki..." | Sakinlər “Qarabağ” - “Çelsi” oyununa bilet tapa bilmədilər

Azərbaycan futbolunu Avropada uğurla təmsil edən “Qarabağ” klubu növbəti dəfə meydana çıxır. Rəqib isə İngiltərənin tanınmış nəhənglərindən “Çelsi”dir.

Rəqibin adı və komandamıza olan böyük inam oyuna marağı daha da artırıb. Lakin əksər azarkeşlər məyus vəziyyətdədirlər, çünki bilet tapmaq mümkün deyil.

Sistem biletlərin tam satıldığını göstərsə də, sosial şəbəkələrdə müxtəlif şəxslərin onları yüksək qiymətə təklif etdikləri müşahidə olunur.

“Qara bazar” biletlərin hamısını alır, sonra baha qiymətə satır”, – azarkeşlərdən biri bildirib.

Digər azarkeş isə belə deyib:

“Biletlər üçün növbəm çatanda sistemdə “bitib” yazıldı. Bildirilir ki, 22 500 bilet satılıb. Bəs 8 300 bilet hara yoxa çıxıb? Bu, müəmmalıdır”.

Məsələ ilə bağlı “iTicket.AZ”ın direktoru Kamran Abbasov bildirib ki, bütün biletlər şəffaf şəkildə satışa çıxarılır və sistem tərəfindən satılır:

“Hər sifariş konkret bir şəxsə məxsusdur və maksimum 5 bilet əldə etmək mümkündür. Ola bilər ki, bəzi şəxslər müxtəlif hesablarla biletləri alır”.