"İkinci əl" geyimlər hansı xəstəlikləri yaradır? - Bunları bilməsəniz, risk altındasınız!

Son vaxtlar ölkədə “ikinci əl” geyimlərə maraq artıb.

Alıcılar hesab edirlər ki, bir geyimə 30-40 manat xərcləməkdənsə, eyni məbləğə 4-5 geyim əldə etmək daha sərfəlidir.

Lakin sual doğuran əsas məqam bu geyimlərin gigiyena baxımından təhlükəsiz olub-olmamasıdır.

Satıcıların sözlərinə görə, geyimlər anbarda xüsusi dezinfeksiya olunduqdan sonra mağazalara gətirilir və gigiyenik sertifikatla təmin olunur.

Dermatoloq Bəxtiyar Paşayev isə xəbərdarlıq edir ki, “ikinci əl” geyimlərin üzərində müxtəlif infeksiyalar qala bilər:

“Əvvəlki sahiblərinin hansı xəstəlikləri olub, bilmirik. Bu geyimlər göbələk, virus infeksiyaları, parazitlər daşıya bilər. Ona görə də mütləq xüsusi kimyəvi dezinfeksiya tədbirləri görülməlidir”.

Məsələyə fərqli yanaşma ilə çıxış edən bioenergetik Əhməd Əhmədov isə geyimlərin “aurası”ndan danışır. O bildirir ki, başqasının geyimini istifadə edən insan özünü narahat hiss edə bilər və bu zaman müəyyən təmizləmə ritualı aparmaq tövsiyə olunur:

“Geyimi suya qoyub adaçayı, ardıç, üzərlik tüstüsünə verməklə onun enerjisini təmizləmək olar”.

Digər mühüm sual isə xaricdən gətirilən ikinci əl geyimlərə nəzarətlə bağlıdır. Dövlət Gömrük Komitəsindən bildirilib ki, yalnız uşaqlar üçün gətirilən paltarlar sanitar nəzarətə aid olan malların siyahısına daxildir. Digər geyimlər üçün isə gigiyenik sertifikat tələbi yoxdur.