"Kərimə dövləti" planının müəllifi

Daxili İşlər Nazirliyi, Dövlət Təhlükəsizliyi Xidməti və Baş Prokurorluğun əməkdaşları İran xüsusi xidmət orqanları tərəfindən ələ alınaraq ölkədə sabitliyin pozulması istiqamətində cinayətlər törətməyi planlaşdıran bir qrup şəxsə qarşı əməliyyat keçirib.

Məlum olub ki, İranda yaşayan və həmin ölkənin xüsusi xidmət orqanları ilə əməkdaşlıq edən Rufulla Axundzadə adlı şəxs Azərbaycanda şəriət qanunları ilə idarə olunan “Kərimə” dövlətinin qurulması məqsədilə “müqavimətçi dəstə” yaradaraq onlara tapşırıqlar verib.

Modern.az-ın yaydığı məlumata görə, Rufulla Axundzadə 1955-ci ildə Astarada anadan olub. 1995-ci ildə İranla əlaqələrinə görə Ali Məhkəmə tərəfindən ləğv edilən İslam Partiyasının sədr müavini olub. 2011-ci ilin yanvarında Ağır Cinayətlər Məhkəməsinin hökmü ilə 11 il 6 ay azadlıqdan məhrum edilib. Cinayət Məcəlləsinin terrora hazırlıq və hakimiyyəti zorla ələ keçirmə maddələri ilə ittiham edilib.

Baş Prokurorluğun rəsmi məlumatına görə, 2011-ci il yanvarın 21-də istintaq qrupu və Astara rayon Polis Şöbəsinin birgə istintaq-əməliyyat tədbirləri nəticəsində Astara sakini R.Axundzadənin yaşadığı evdə axtarış aparılarkən həyətindəki saxlanc yerindən 4 avtomat, 1 tapança, avtomat silahlar üçün nəzərdə tutulan və içərisində patronlar olan 3 sandıqça, 9 əl qumbarası, xeyli sayda alışdırıcı və patron, 7 CD formatlı disk və digər predmetlər aşkarlanaraq götürülüb.

R.Axundzadə 2021-ci ilin martında əfv sərəncamı ilə azadlığa buraxılıb. O, həbsdən çıxandan sonra İranın xüsusi xidmət orqanlarının tapşırıqları ilə Azərbaycan dövlətinin əleyhinə fəaliyyətə başlayıb və bu məqsədlə bəzi dindarları öz ətrafında toplayıb.