"Kişilərin məsuliyyətsizliyinə görə..." | Niyə nikahdankənar doğulanların sayı belə çoxdur?

Son 5 ildə Azərbaycanda 82 944 uşaq nikahdankənar doğulub.

Dövlət Statistika Komitəsinin rəsmi göstəricilərinə əsasən, təkcə ötən il ölkədə qeyri-rəsmi nikahdan olan qadınların dünyaya gətirdiyi körpələrin sayı 13 mini ötüb. 2023-cü ildə isə bu rəqəm 15 mindən, 2022-də 18 mindən çox, 2020-2021-ci illərdə isə bu say ayrı-ayrılıqda 18 minə yaxın olub. Statistikaya 18 yaşadək olan analar tərəfindən dünyaya gətirilən uşaqlar da daxildir.

Bəs körpələrin nikahdankənar doğulmasının səbəbi nədir? Baku TV bu sualla paytaxt sakinlərinə müraciət edib.

“Heç kim ailə qurmaq istəmir, çünki biri-biri ilə yola gedə bilmirlər. Uşağı da özləri üçün dünyaya gətirirlər ki, beş stəkan su verənləri olsun”, – deyə bir sakin bildirib.

Başqa bir sakin isə belə deyib: “Kişilərin məsuliyyətsizliyidir. Qadınlarla rəsmi şəkildə evlənmirlər, amma münasibət qururlar”.

Ailə, Qadın və Uşaq Problemləri üzrə Dövlət Komitəsindən məsələyə belə münasibət bildirilib:

“Ölkə üzrə nikahdankənar doğulan uşaqların sayında son 3 ildə nisbətən azalma müşahidə edilir. Müsbət tendensiya ailənin cəmiyyətdəki rolunun möhkəmlənməsi, ailələrin rifahının yaxşılaşdırılması istiqamətində aparılan normativ-hüquqi islahatların, eləcə də valideyn məsuliyyətinin gücləndirilməsi və gənclərə milli-mənəvi dəyərlərin aşılanması ilə bağlı ardıcıl olaraq aparılan fəaliyyətin nəticəsidir”.