"Tanrı öldü" ifadəsinin gizli mənası nədir? | "Musiqi haram yox, ibadətin vacib elementidir" - AMİN

“Amin” verilişinin yeni buraxılışında musiqişünas Fəxrəddin Salim ilə həqiqət mövzusu ətrafında fikir mübadiləsi aparılıb.

O, təsəvvüf fəlsəfəsindəki “çillə” anlayışından və bu ayinin mahiyyətindən bəhs edib:

“Çillə zamanı 40 gün boyunca bir məkana qapanaraq xarici dünyadan təcrid olunursan. Demək olar ki, bütün sufi təriqətlərində bu təcrübə mövcuddur. 90-cı illərdə tələbə ikən mənə də bu, qismət oldu. “28 May” metro stansiyası yaxınlığında kirayə qaldığım evdə 40 gün təkliyə qapandım. Minimum qida (bişmiş arpa və su), ibadət, zikr və sazın müşayiəti ilə bu müddəti tamamladım. İnsanı o vəziyyətdə saxlayan yalnız ibadət deyil, ruhun keçdiyi eşq mərhələsidir”.

Musiqişünas çillə bitdikdən sonra yaşadığı mənəvi halı belə təsvir edib:

“40 günün tamamında küçəyə çıxdım. Orada cəmi bir neçə adam gördüm, qalanlarının isə buynuzu və quyruğu var idi. Hamı şeytan idi. Bu hal cəmi bir neçə dəqiqə çəkdi. Dünyəvi qayğılar və ailə nigaranlığı məni yenidən əvvəlki həyata qaytardı”.

Fəxrəddin Salim musiqinin dindəki yeri və şəriət qanunları ilə münasibətinə də aydınlıq gətirib:

“Mərifət və həqiqət aləmində musiqi haram deyil, əksinə, ibadətin ən vacib elementidir. Bizim dünyamızda musiqinin haram olmasının heç bir məntiqi əsası yoxdur. Əslində, haram olan musiqi deyil, onun mövzusudur”.