Azərbaycanda ana 38 illik həsrətdən sonra övladını qucağına götürdü - Baku TV

Azərbaycanda 63 yaşlı qadın 38 ildən sonra ana olub.

O, çəkisi 2 kiloqram 220 qram olan qız övladı dünyaya gətirib.

Mama-ginekoloq Natiq Məhərrəmov bu barədə jurnalistlərə açıqlama verib.

"Pasiyent bizə müraciət edəndə yaş faktorunu nəzərə alaraq bunun riskli bir hamiləlik ola biləcəyini bildirdik. Hamiləlikdən öncə xanım iki il müddətində tam müayinə olundu. Onun nevroloji, psixoloji vəziyyəti daxil olmaqla bütün müayinələrin yekun rəyləri alındı. Ana ola biləcəyinə dair müsbət rəy verildikdən sonra hamiləliyin təqibi zamanı yarana biləcək bütün mümkün risklər barədə cütlüyə ətraflı məlumat verildi.

Buna baxmayaraq, ailə övlad sahibi olmağı çox istəyirdi və bütün riskləri qəbul etməyə hazır olduqlarını bildirdilər. Hamiləlik 35-ci həftəsində qeysəriyyə əməliyyatı ilə uğurla sonlandırıldı və 2220 qram çəkidə bir qız uşağı dünyaya gəldi. Doğuşdan sonra ananın kardioloq və terapevt baxışları keçirildi. Zahılıq dövrünün 4-cü günündə ananın vəziyyəti normaya uyğun qiymətləndirilərək evə buraxıldı. Hazırda körpənin də vəziyyəti yaxşıdır", – deyə o bildirib.