"Uşaq yatdığı yerdə dəfələrlə..." | Ailənin yaşadığı yerdə ürəkağrıdan mənzərə - Baku TV

Gəncədə yaşayan, əslən Kəlbəcərdən olan ailə mənzil şəraitinin yararsız halda olmasından şikayətçidir. İmanovlar ailəsi hazırda keçmiş yataqxana binasında məskunlaşıb.

Baku TV-nin qaynar xəttinə müraciət edən ailə başçısı Rusif İmanov azad olunan ərazilərdə mənzillə təmin olunmaq üçün aidiyyəti qurumlardan kömək istəyir.

“1998-ci ildə Gəncə şəhərində anadan olmuşam, 2020-ci ildə ailə qurmuşam. Hazırda üç övladım var, şəraitimiz çox ağırdır. Dəfələrlə aidiyyəti orqanlara müraciət etmişəm ki, bizi azad olunmuş torpaqlarda evlə təmin etsinlər. Bizə bildirilib ki, Zivel kəndi tikiləndə köçürüləcəyik. Mən normal şəraitdə yaşamaq istəyirəm, lakin müraciətlərimizə hələ ki, müsbət cavab verilmir”, – deyə o bildirib.

Məsələ ilə bağlı Qaçqınların və Məcburi Köçkünlərin İşləri üzrə Dövlət Komitəsindən qeyd olunub ki, qurum kəlbəcərli məcburi köçkün Rusif Çərkəz oğlu İmanovun vəziyyətindən məlumatlıdır.

Komitədən vurğulanıb ki, hazırda işğaldan azad edilmiş ərazilərdə bərpa və yenidənqurma işləri sürətlə davam etdirilir. Köçürülmə prosesi zamanı qəzalı və ağır şəraitli binalarda, o cümlədən yataqxana və digər müvəqqəti məskunlaşma obyektlərində yaşayan ailələrə üstünlük verilir:

“Bu səbəbdən Rusif İmanov və ailə üzvlərinin işğaldan azad edilən ərazilərə köçürülməsi məsələsinə mərhələli və qanunauyğun formada baxılacaq”.