Region gənclərinə yeni imkanlar təqdim olundu | Gələcəyin peşələri ilə tanışlıq - Baku TV

Dövlət Məşğulluq Agentliyi və Qax Rayon İcra Hakimiyyətinin təşkilatçılığı ilə Qax rayonunda Region Gənclərinin Məşğulluq Forumu keçirilib.

Tədbirdə Dövlət Məşğulluq Agentliyinin İdarə Heyətinin sədri Hasil Abbasov, Qax Rayon İcra Hakimiyyətinin başçısı Elvin Paşayev, Vətəndaşlara Xidmət və Sosial İnnovasiyalar üzrə Dövlət Agentliyinin sədr müavini Ceyhun Salmanov, işəgötürənlər və digər rəsmi qonaqlar iştirak ediblər.

Tədbirdə çıxış edən Dövlət Məşğulluq Agentliyinin İdarə Heyətinin sədri Hasil Abbasov bildirib ki, gənclərin məşğulluğunun təmin edilməsi, onların əmək bazarının tələblərinə uyğun bacarıqlar əldə etməsi və düzgün karyera seçiminə dəstək göstərilməsi Agentliyin fəaliyyətinin əsas istiqamətlərindəndir. Bu məqsədlə müxtəlif layihələr həyata keçirilir və məşğulluq tədbirlərinin icrasında gənclərə üstünlük verilir.

Forum çərçivəsində gənclər üçün peşə və məşğulluq yarmarkası təşkil olunub, müasir peşələrlə bağlı tanıtım stendləri qurulub, eləcə də region gənclərinin uğur hekayələrini əks etdirən sərgi təqdim edilib. Tədbir çərçivəsində həmçinin bədii hissə də təşkil olunub.