Şabranda bu yol sürücülər üçün təhlükəli vəziyyət yaradır - Baku TV

Şabran rayonunda 8 ay bundan öncə güclü selin yaratdığı fəsadlar hələ də aradan qaldırılmayıb.

Belə ki, rayonun Bor-bor kəndi yaxınlığındakı körpünün bir hissəsinin dağılması nəticəsində yüzlərlə sakin çətinliklə üzləşib. Ərazidə müvəqqəti alternativ yol salınsa da, yararsız vəziyyətə düşüb.

Məsələ ilə bağlı Azərbaycan Avtomobil Yolları Dövlət Agentliyindən bildirilib ki, artıq yolda təhlükəsizliyi təmin etmək üçün müvafiq tapşırıqlar verilib:

“Bundan əvvəl də həmin ərazidə maneələrin quraşdırılması, eləcə də xüsusi yol nişanlarının yerləşdirilməsi Agentlik tərəfindən həyata keçirilib. Lakin görülən tədbirlərə baxmayaraq, naməlum səbəblərdən həmin təhlükəsizlik vasitələri bir neçə dəfə sakinlər tərəfindən ərazidən kənarlaşdırılıb. Yaranmış vəziyyət nəzərə alınaraq yenidən tapşırıq verilib və yaxın vaxtlarda ərazidə yol hərəkətinin təhlükəsizliyini təmin etmək üçün əlavə tədbirlər görüləcək”.