Şabranda yol problemi | Uçan körpü nə vaxt bərpa olunacaq? - Baku TV

Aprel ayında yağan leysan yağışlar və Şabrançaya gələn güclü sel Şabran rayonunda bir sıra fəsadlara səbəb olub.

Əmirxanlı kəndinin ərazisində körpü uçub. Bu səbəbdən aylardır ki, beş kəndin sakinləri çətinliklərlə üzləşirlər.

Baku TV-nin qaynar xəttinə müraciət edən vətəndaşlar aidiyyəti qurumlardan kömək istəyirlər.

“8-9 aydır ki, körpünü təmir edən yoxdur. Yağış yağanda maşınlar hərəkət edə bilmir, burada batıb qalır”, – sakinlərdən biri narazılığını dilə gətirib.

Məsələ ilə bağlı Azərbaycan Avtomobil Yolları Dövlət Agentliyindən (AAYDA) bildirilib ki, sözügedən ərazidəki problemdən xəbərdardırlar:

“Əməkdaşlarımız tərəfindən əraziyə baxış keçirilib. Təkliflər hazırlanaraq aidiyyəti üzrə təqdim olunub. Həmin təkliflər qəbul olunandan sonra ərazidə körpünün bərpa edilməsi tərəfimizdən təmin olunacaq”.