Sevindirib 3 ay sonra məktəb tikdilər, amma… | Qubada valideynlər çıxılmaz vəziyyətə düşdü

Quba rayonu Dəyanət İsmayılov adına Çiçi kənd tam orta məktəbin valideynləri təhsil ocağında işıq və istilik sisteminin olmamasından şikayətçidirlər.

Valideynlər problemlər səbəbindən uşaqlarını dərsə göndərmirlər.

“Keçən il siz gəlib çəkdiniz. Sonra bizi sevindirib 3 aydan sonra məktəb tikdilər. Ancaq sevincimiz axıra kimi davam etmədi. Dekabr ayıdır, havalar soyuyub. Uşaqları 4-5 gündür məktəbə getməyə qoymuram, çünki xəstələnirlər”, – deyə kənd sakini narazılığını dilə gətirib.

Məsələ ilə bağlı Quba-Xaçmaz Regional Təhsil İdarəsindən bildirilib ki, adıçəkilən məktəbin istiliklə təchizatı kombi sistemi vasitəsilə həyata keçirilir:

“Təhsil müəssisəsinin elektrik enerjisi ilə təchizatı ilə bağlı sənədləşmə işlərində problem yarandığı üçün istiliklə təminatda fasilə yaranıb. Hazırda problemin həlli istiqamətində aidiyyəti qurumla birgə iş aparılır. Məsələnin qısa zamanda həll olunması üçün zəruri tədbirlər görülür”.