Sığorta şirkətinin ödədiyi məbləğ nə dərəcədə qane edir?

Yol-nəqliyyat hadisəsi zamanı qarşı tərəfə dəymiş zərərin ödənilməsi üçün 2011-ci ildən icbari sığorta məcburi oldu. Bundan sonra baş verən hadisə zamanı dəymiş zərərin 5 min manatını sığorta şirkəti qarşılayır.

Mütəxəsislər isə hesab edirlər ki, bu gün ödənilən məbləğ çox azdır və dəymiş zərəri qarşılamır.

Sığorta eksperti Emil Ağabağırov bildirib ki, əvvəlki illərdə dəymiş zərərin məbləği orta hesabla 1500-2000 min manata qədər olurdu:

“Son 3-4 ilə nəzər saldıqda görürük ki, bu məbləğ 2 dəfə artıb. Bu da ölkəyə gələn yeni avtomobillər və onların ehtiyat hissələrinin qiymətinin artması ilə bağlıdır”.

Mütəxəsislərin sözlərinə görə, bu gün ölkəmizdə avtomobil parkının yenilənməsi onu göstərir ki, icbari sığorta məbləği dəymiş zərərin ödənilməsinə yetmir. Ona görə də qiymətlər artırılmalıdır.