"Silə bilmirlər, indi də..." | Kreditdən qurtulmaq istəyənlərin başına necə oyun açırlar? - Baku TV

Sosial şəbəkələrdə “Borclarınızı silirik” başlığı ilə elan yayan səhifələrə diqqət yetirmək lazımdır.

Bu cür səhifələr borcdan xilas olmaq istəyən şəxslərdən müəyyən məbləğdə pul və şəxsi məlumatlar tələb edirlər. Beləliklə, vətəndaş həm pulunu itirir, həm də şəxsi məlumatlarının ələ keçirilməsi riski ilə üzləşir.

Bəs vətəndaşlar bu cür saxta elanları necə ayırd edə bilərlər?

Bank məsələləri üzrə ekspert İsmayıl Məmmədovun sözlərinə görə, kredit müqaviləsi iki tərəf arasında bağlanır və üçüncü şəxslərin bu prosesə müdaxiləsi qanunvericiliyə ziddir:

“Kredit müqavilələri iki tərəf arasında bağlanmış müqavilələrdir. Bu müqavilələrdə müştəri və bank iştirak edir. Bu münasibətlərdə üçüncü şəxsin müdaxiləsi qanunvericiliyə ziddir.

Nəzərə almaq lazımdır ki, bütün kredit münasibətləri “Banklar haqqında” qanun və Mərkəzi Bankın müvafiq təlimatları ilə tənzimlənir. Hazırda bir çox dələduzluq halları mövcuddur. Bu hallarda vətəndaşların şəxsi məlumatlarının əldə edilməsi, onların şantaj olunması və əlavə gəlir əldə edilməsi məqsədilə müxtəlif üsullardan istifadə olunur.

Heç bir bank əməkdaşı sizdən şəxsi və ya təhlükəsizlik kodlarınızı tələb etmir. Həmçinin hər hansı xidmət göstərilməsi üçün əvvəlcədən üçüncü şəxslərə ödəniş etməyiniz tələb oluna bilməz.

Kreditlərlə bağlı hər hansı problem yaranarsa, birbaşa həmin bank və ya bank olmayan kredit təşkilatına müraciət etmək lazımdır. Bunun üçün qurumun rəsmi saytından və ya filiallarına yaxınlaşaraq yazılı şəkildə müraciət etmək tövsiyə olunur”.