Skuter uşaqlarda ciddi sağlamlıq problemlərinə səbəb olur | Həkimlər xəbərdarlıq edir - Baku TV

Son zamanlar uşaqlar arasında skuter sürməyə marağın artdığı müşahidə olunur. Bu onlar üçün həm əyləncə, həm də rahat nəqliyyat növü hesab edilsə də, mütəxəssislər ciddi təhlükələr barədə xəbərdarlıq edirlər. Bildirilir ki, skuter bəzi hallarda uşaqlarda sümük və əzələ problemlərini kəskinləşdirə bilər.

Pediatrların qənaətinə görə, uşağın hər gün uzun müddət skuterdən istifadə etməsi skolioz və kifoz kimi onurğa problemlərinin yaranmasına səbəb ola bilər. Eyni zamanda qeyd olunur ki, valideynlər övladlarına yalnız onların yaş qruplarına uyğun olan skuterlərdən istifadə etməyə icazə verməlidirlər.

Mövzu ilə bağlı danışan pediatr Məhsəti Nəcəfova bildirib ki, sümük-əzələ problemləri, skoliozu, ciddi yastıpəncəliyi və xüsusən oynaq xəstəlikləri olan uşaqların skuterdən istifadəsi mütləq fərdi qaydada qiymətləndirilməlidir:

“Bu zaman ortoped və pediatrın məsləhəti mütləqdir. Skuter sürərkən uşaqların çoxu bədənin ağırlığını əsasən bir ayağın üzərinə salır və uzun müddət eyni vəziyyətdə qalır. Bu isə aşağı ətraf əzələlərinin yorulmasına, eyni zamanda venoz qan dövranının pozulmasına səbəb olur. Bu proses birbaşa varikoz problemi yaratmasa da, dolayı yolla buna şərait yaradır”.

Vurğulanır ki, uşaqların sağlamlığını qorumaq məqsədilə gün ərzində 20 dəqiqədən artıq skuterdən istifadə edilməsi tövsiyə olunmur.