"Su kanalizasiyaya qarışıb, kanalizasiya suya" | Xətaidə əhalinin səbrini daşıran vəziyyət - Baku TV

Sakinlər Baku TV-nin qaynar xəttinə müraciət edərək bildiriblər ki, Xətai rayonunun Musa Əsgərov küçəsində bir müddətdir kanalizasiya xəttində problem yaranıb.

Məsələ ilə bağlı mütəxəssislər əraziyə gəlib və problemin həlli üçün yolun bir hissəsində təxminən bir metr dərinliyində quyu qazılıb.

Sakinlərin sözlərinə görə, quyu qazıldıqdan sonra ərazi bir aydan artıqdır ki, bu vəziyyətdə saxlanılır və problem hələ də həllini tapmayıb.

“Gəldilər, borunu da sındırdılar. İndi su kanalizasiyaya qarışıb, kanalizasiya da suya. Mən o tərəfdə yaşayıram. İy ora kimi gəlir. Burada yaşayan yazıqlar qoxuya görə pəncərəni aça bilmirlər”, – sakinlərdən biri deyib.

Digər sakin isə kanalizasiyanın tez-tez daşdığını və məsələ ilə bağlı aidiyyəti qurumlara dəfələrlə müraciət etdiklərini bildirib.

“Kanalizasiya bir gündən bir daşır. Su idarəsinə dəfələrlə getmişik, ərizə yazıb vermişik. Gəlib baxdılar, qazdılar. İndi oranı da su basıb. Burada qurumuş ağac var. Deyirlər ki, ağacı kəsib kanalizasiya xətti çəkmək üçün Ekologiya və Təbii Sərvətlər Nazirliyi icazə verməlidir. İki aydır məsələni belə uzadırlar”, – sakin söyləyib.