Köhnə avtomobilini yeniləmək istəyənlərin nəzərinə: 1050 manatlıq fürsət nədir? - Baku TV

Abşeron rayonunun Hökməli qəsəbəsində yerləşən utilizasiya mərkəzinə hər gün onlarla köhnə və sıradan çıxmış avtomobil təhvil verilir. Burada emal olunan nəqliyyat vasitələri həm ətraf mühitin qorunmasına töhfə verir, həm də sahiblərinə gəlir qazandırır.

Nəqliyyat vasitələrinin utilizasiyası prosesi barədə “Təmiz Şəhər” ASC-nin mətbuat katibi Orxan Cabbarlı məlumat verib.

“Nəqliyyat vasitələrinin utilizasiyası prosesinə 2024-cü ilin oktyabr ayından başlanılıb və bu iş qeydiyyatdan keçmiş utilizatorlar tərəfindən həyata keçirilir. Hazırda ölkə üzrə dörd utilizator qeydiyyatdan keçərək fəaliyyət göstərir.

Utilizasiya məntəqələrinə köhnəlmiş, istifadəyə yararsız vəziyyətə düşmüş nəqliyyat vasitələri təhvil verilir və burada utilizasiya prosesinə cəlb olunur. Əldə olunmuş təkrar emal xammalı istehsal və sənaye müəssisələrinə göndərilir.

Bu proses həm ətraf mühitin qorunmasına xidmət edir, həm də nəqliyyat vasitəsini təhvil verən şəxslərə birdəfəlik ödəniş və ya təsdiqedici sənəd almaq imkanı yaradır. Bu da vətəndaşların sosial vəziyyətinin yaxşılaşdırılmasına, yəni yararsız nəqliyyat vasitəsini dəyərə çevirməsinə şərait yaradır.

Nəqliyyat vasitələrinin təsnifatından asılı olaraq ödəniş məbləğləri fərqlənir. Məsələn, minik avtomobillərinin sahibləri yerli istehsal olan yeni nəqliyyat vasitəsi almaq istədikdə 1500 manat dəyərində təsdiqedici sənəd əldə edirlər. Həmin sənədlərdən bir neçəsini toplayaraq yeni avtomobil almaq mümkündür. Vətəndaş birdəfəlik nağd ödənişə üstünlük verərsə, bu zaman 1050 manat məbləğində vəsait ala bilər”, – deyə o bildirib.