Tamaşaçı ilə doğmalaşan böyük rejissor Ramiz Həsənoğlu haqqında “Sənin boyun ucadır” sənədli filmi

Baku TV-nin təqdim etdiyi “Sənin boyun ucadır” sənədli filmi Xalq artisti, görkəmli rejissor Ramiz Həsənoğlunun zəngin yaradıcılıq yoluna və sənət dünyasına işıq tutur.

Ekran əsərində sənətkarın yaxın dostları və həmkarları onunla bağlı maraqlı, həm də səmimi xatirələrini bölüşüblər.

Əməkdar artist Dilarə Əliyeva sənətkarla iş birliyinin necə yaranmasından danışarkən illər əvvəl etdiyi bir zəngin həyatındakı rolundan bəhs edib.

Aktrisa bildirib ki, bir gün “Sabah” Yaradıcılıq Emalatxanasına zəng vurub və telefonu Ramiz Həsənoğlunun özü götürüb. Bu qısa ünsiyyətdən bir müddət sonra isə gözlənilməz dəvət alıb. Belə ki, rejissor onu yeni tamaşasında baş rola dəvət edib.

Ramiz Həsənoğlu ilə işləmək arzusunun hər şeydən üstün olduğunu deyən Dilarə Əliyeva həmin təklifi böyük sevinc və həvəslə qəbul etdiyini vurğulayıb.

Rejissor, Əməkdar incəsənət xadimi Bəhram Osmanov isə Ramiz Həsənoğlunun Azərbaycan incəsənətindəki pedaqoji və yol göstərən missiyasına diqqət çəkib.

O qeyd edib ki, Ramiz bəy bir nəslə kamera arxasında işləməyin sirlərini və kino estetikasını aşılayıb.

Bəhram Osmanovun fikrincə, “Sabah” Yaradıcılıq Emalatxanasında püxtələşən bir çox gənc və orta nəsil teatr rejissorlarının sonradan professional kino sahəsinə cəlb olunmasında və bu sahədə uğur qazanmasında Ramiz Həsənoğlunun böyük əməyi var.