Vallah, bizlik deyil... | Sakinlərin ev arzusunu ürəyində qoyan MTK-dan gülünc cavab

Nizami rayonu, Əliağa Kürçaylı, 70A ünvanında yaşayan sakinlər 6 il öncə yeni ev aldığı üçün sevinsələr də, xoşbəxtlikləri uzun çəkməyib.

Çünki nə etsələr də, Mənzil Tikinti Kooperativindən çıxarış ala bilməyiblər.

Onların sözlərinə görə, buna səbəb layihədə 16 mərtəbə nəzərdə tutulan binanın 17 mərtəbəli tikilməsidir:

“300-ə yaxın mənzildir, 600-dən çox sakin var. Sakinlər uşaqlarını yaxınlıqdakı bağçaya, məktəbə qeydiyyata sala bilmirlər. Bina qeydiyyatda olmadığı üçün sakinlər səsvermədə iştirak edə bilmirlər, heç bildiriş də verilmir. Dəfələrlə şifahi və yazılı şəkildə bəzi qurumlara müraciət etmişik, hələ ki heç birinin nəticəsini görməmişik”.

Problem ilə əlaqədar sözügedən Mənzil Tikinti Kooperativindən və Bakı Şəhər İcra Hakimiyyətindən bildirilib ki, məsələ onların səlahiyyətləri çərçivəsində deyil.

Bəs görəsən bu halda qanun nə deyir?

Hüquqşünas Hikmət Əliyevin sözlərinə görə, mənzillərin çıxarışının verilməsi Bakı Şəhəri İcra Hakimiyyətinin yox, Daşınmaz Əmlakın Dövlət Reyestri Xidmətinin səlahiyyətindədir:

“Mənzil alan vətəndaşlar ilk olaraq MTK-nın inşa etdiyi binanın müvafiq dövlət qurumu tərəfindən istismara qəbul edilib-edilməməsini, yəni istismara qəbul aktının olub-olmamasını dəqiqləşdirməlidir. Əgər bina istismara qəbul edilibsə, Dövlət Reyestrindən çıxarış almaq üçün mənzilin verilməsi barədə MTK üzvlərinin ümumi yığıncağının qərarı tələb olunur.

MTK tərəfindən tələb olunan sənədlər vətəndaşa təqdim edilmədikdə, sənədlərin siyahısı qeyri-dəqiq olduqda bu zaman Daşınmaz Əmlakın Dövlət Reyestri Xidməti çıxarışın verilməsindən imtina edir. Belə olan halda vətəndaşlar məhkəmədə iddia qaldırmaqla çıxarışın alınmasına nail ola bilərlər”.