Vardanyan məhkəmədən nə xahiş etdi? - Zərərçəkənlərin ifadələri... - Baku TV

Azərbaycan Respublikasının Cinayət Məcəlləsinin sülh və insanlıq əleyhinə cinayətlər, müharibə cinayətləri, habelə terrorçuluq, terrorçuluğu maliyyələşdirmə ilə bağlı maddələri ilə və digər ağır cinayətlərdə təqsirləndirilən Ermənistan vətəndaşı Ruben Vardanyanın barəsində cinayət işi üzrə məhkəmə prosesi keçirilib.

Zərərçəkmiş Nuran Qasımov və Əlimuxtar İbrahimov ifadələrində Laçında düşmənin ərazilərimizə hücumu nəticəsində xəsarət aldıqlarını söyləyiblər.

Hadisə zamanı onlardan başqa da yaralananların olduğunu deyiblər.

Pənah Əliyev Laçında düşmən təxribatı zamanı başından, Əsgər Bəylərov isə qapalı kəllə-beyin travması, bundan başqa, daha bir neçə şəxsin müxtəlif dərəcəli bədən xəsarətləri aldıqlarını diqqətə çatdırıblar.

Zərərçəkmiş Elvin Səlimov, Ülvi Rəhimov və Samir Məmmədov da Laçında düşmənin ərazilərimizə hücumu zamanı yaralandıqlarını vurğulayıblar.

Məhkəmə prosesi digər zərərçəkmiş şəxslərin ifadələrinin elan olunması ilə davam etdirilib. Belə ki, iş üzrə zərərçəkmiş şəxs qismində tanınmış bir qrup şəxs əvvəlki proseslərdə məhkəməyə müraciət ünvanlayaraq, iclaslarda üzrlü səbəbdən iştirak edə bilmədiklərini, ibtidai istintaq zamanı verdikləri ifadələrini təsdiqlədiklərini bildirən ərizələr göndəriblər. Ötən məhkəmə iclaslarında tərəflər həmin ifadələrin məhkəmədə elan olunmasına etiraz etməyiblər.

Sənədlərin elan olunması zamanı təqsirləndirilən şəxs Ruben Vardanyan vəsatətlə çıxış edib. O, cinayət işi ilə bağlı bəzi sənədlərlə, o cümlədən sorğularla tanış olmaq istədiyini söyləyib.

Məhkəməyə sədrlik edən Zaur Ağayev vəsatətlə bağlı bildirib ki, müdafiə tərəfi bu həftə ərzində həmin sənədlərlə tanış ola bilər və onlara buna dair zəruri şərait yaradılacaq.