Velosiped zolağından niyə piyada keçidi kimi istifadə edirlər? – Nəqliyyat ekspertindən açıqlama

Bakının bir neçə mərkəzi küçəsində çəkilən velosiped zolaqları sakinlərin və sürücülərin narazılığına səbəb olub.

Belə ki, Fikrət Əmirov və Xəqani küçələrinin kəsişməsində velosipedlərin rahat şəkildə hərəkəti üçün zolaq çəkilsə də, buradan adətən piyadalar keçirlər.

“Piyadalar səhvən bu velosiped zolağından keçirlər. O gün bir avtomobil vaxtında saxlaya bilməsəydi, qadını vuracaqdı”, – deyə sakin söyləyib.

28 May və Fikrət Əmirov küçələrinin kəsişməsində isə üç geniş avtomobil zolağının üzərində velosiped zolağı çəkilib, bir az irəlidə isə piyada keçidi təşkil olunub. Bu da sürücülərin ard-arda iki dəfə dayanmalı olması deməkdir.

“Sürücü piyada keçidində əyləcə basdıqdan sonra hərəkətə davam etmək istəyəndə qarşıdakı velosiped zolağında saxlamalı olur. Piyada keçidi ilə velosiped zolağı yan-yana olsa, sürücülər üçün daha rahat olar”, – sürücü narazılıq bildirib.