Yaşayış minimumu artsa, aliment məbləği necə dəyişəcək? | Hüquqşünasdan açıqlama - Baku TV

Azərbaycanda uşaqlar üçün yaşayış minimumunun 2027-ci ildə 274 manata çatdırılması aliment məbləğlərinin artırılması məsələsini gündəmə gətirir.

Lakin yaşayış minimumunun yüksəlməsi alimentin avtomatik artırılması demək deyil. Hüquqşünas Əsgər Abdullayev məsələ ilə bağlı hüquqi prosedurları izah edib.

Onun sözlərinə görə, Azərbaycan Respublikasının Ailə Məcəlləsinə əsasən, aliment bir qayda olaraq valideynin gəlirinin müəyyən hissəsi şəklində tutulur. Bir uşağa görə gəlirin dörddəbiri, iki uşağa görə üçdəbiri, üç və daha çox uşağa görə isə yarısı aliment kimi ödənilir.

Hüquqşünas bildirib ki, valideynin gəliri olmadıqda, qeyri-müntəzəm dəyişdikdə və ya gəlirdən pay şəklində tutulma mümkün olmadıqda aliment sabit pul məbləğində müəyyən edilə bilər.

“Ali Məhkəmənin formalaşdırdığı hüquqi mövqeyə əsasən, aliment sabit pul məbləğində tutulduqda uşaq yaşayış minimumundan az olmayan məbləğdə aliment almaq hüququna malik olur. Məhkəmələr bir qayda olaraq bu mövqeyi nəzərə alır”, – deyə Əsgər Abdullayev qeyd edib.

O bildirib ki, uşaqlar üçün yaşayış minimumunun artırılması alimentin məbləğinin avtomatik yüksəlməsinə səbəb olmur. Alimentin məbləği məhkəmə tərəfindən müəyyən edilibsə, tərəf yenidən məhkəməyə müraciət edərək onun artırılmasını tələb edə bilər.

Əsgər Abdullayevin sözlərinə görə, əvvəlki illərdə müəyyən edilmiş aliment məbləğlərinin yeni göstəricilərə uyğunlaşdırılması indeksasiya yolu ilə də həyata keçirilə bilər. Aliment minimum əməkhaqqının müəyyən misli əsasında təyin edildikdə minimum əməkhaqqı artdıqca ödənişin məbləği də yüksəlir.

“Aliment konkret sabit məbləğdə müəyyən edilibsə, tərəflər məhkəməyə müraciət edərək onun artırılmasını tələb edə bilərlər”, – deyə hüquqşünas vurğulayıb.