Yoxlama aparılan klinika yayılan xəbərləri təkzib etdi | Detallar açıqlandı

"Laser Beauty Estetik Klinikası"ndan Səhiyyə Nazirliyinin Analitik Ekspertiza Mərkəzinin özəl tibb müəssisəsində apardığı yoxlama ilə bağlı yaydığı açıqlamaya münasibət bildirilib.

Oxu.Az-a açıqlama verən özəl tibb müəssisəsinin baş həkimi Rəna Soltanovanın köməkçisi nazirliyin yaydığı məlumatı təkzib edib. O gedən xəbərlərin yanlış olduğunu qeyd edərək hazırda fəaliyyətlərini davam etdirdiklərini bildirib.

Xatırladaq ki, Səhiyyə Nazirliyi Analitik Ekspertiza Mərkəzinin yoxlayıcı-mütəxəssisləri tərəfindən Yasamal rayonunda fəaliyyət göstərən "Laser Beauty Estetik Klinikası"nda yoxlamalara başlanılıb.

Yoxlama zamanı lisenziyanın şərtlərinə riayət olunması, özəl tibb fəaliyyəti subyekti tabeliyində çalışan tibb mütəxəssislərinin sertifikasiyaya cəlb edilməsi, lisenziyada nəzərdə tutulan işlərdən və xidmətlərdən kənar tibb fəaliyyətinin həyata keçirilməsinin qanunauyğunluğu araşdırılıb. Yoxlama nəticəsində tibbi qeydiyyat sənədlərinin Səhiyyə Nazirliyi tərəfindən təsdiq edilən forma və qaydalar üzrə aparılmadığı məlum olub.