Yüksək binalar üçün yeni layihə normaları təsdiq edildi

Azərbaycan Dövlət Şəhərsalma və Arxitektura Komitəsinin Kollegiyası "Yüksək binalar və komplekslər. Layihələndirmə normaları"nı təsdiqləyib. Qərara əsasən, layihələndirilən hündür binalar yüksək məsuliyyət səviyyəsinə aiddir və konstruksiyalarının hesablama istismar müddəti 100 ildən az olmayaraq qəbul edilməlidir.

Etibarlılıq əmsalı binanın hündürlüyündən asılı olaraq təyin olunur (1.1, 1.15, 1.2). Layihə sənədlərinin tərkibinə binanın əsas xüsusiyyətlərini özündə əks etdirən texniki pasport daxil edilməlidir. Yanğından mühafizə layihələri avtomatlaşdırılmış yanğınsöndürmə və xəbərdarlıq sistemlərini nəzərdə tutmalıdır. Həmçinin, 9 hektardan artıq tikinti ərazisi olan komplekslərin ətrafında dairəvi yol layihələndirilməlidir ki, binalarla yol arasındakı məsafə 25 metrdən çox olmasın.