3 ölkə istiqamətindən Ukraynaya hücum | Rusiya döyüş taktikasını dəyişdi?

Artıq bir həftədir ki, bütün Ukrayna ərazisi demək olar ki, fasiləsiz hava hücumlarına məruz qalır. Paytaxt Kiyevdə hər saat həyəcan siqnalları verilir, əhali təcili sığınacaqlara üz tutur.

Ukrayna Hərbi Hava Qüvvələri Komandanlığının rəsmisi Yuri İqnat Baku TV-nin Şərqi Avropa bürosuna bildirib ki, qırıcı təyyarə və pilotsuz uçuş aparatlarının hücumları artıq sadəcə Rusiya istiqamətindən həyata keçirilmir:

“Ukrayna hava sahəsinə əsasən Belarus, Moldova və Rusiya istiqamətindən qırıcı təyyarələr gecə boyunca hücum edir. Müxtəlif ərazilərdə dağıdıcı zərbələr qeydə alınıb. Vətəndaşların əmlakına ziyan dəyib, çoxmərtəbəli yaşayış binalarında tələfatlar var. Zərərçəkənlərə fəal yardım göstərilir.

Düşmən bu taktikadan istifadə edir, onu dəyişir, təbii ki, müxtəlif sistemlərlə təkmilləşdirir. Düşmən gecələr PUA-ların istifadəsini daha effektiv etmək üçün yeni texnikalardan istifadə edir. Müdafiə güclərimiz bunun üçün məşq edir. Havadan təhlükə təxminən rekord olaraq 95%-dir”.

Ukrayna Milli Polisinin sözçüsü Yuliya Qirdvilis isə Baku TV-yə son 3 gündə ölkə üzrə olan itkiləri açıqlayıb.

“Düşmən Xarkov, Odessa, Donetsk, Nikolayev və Zaporojye vilayətlərinin əhalisini intensiv atəşə tutur. Hücumlar nəticəsində 9 nəfər həlak olub, 5-i uşaq olmaqla daha 34 nəfər isə yaralanıb. Təkcə Donetsk vilayətində 34 mülki obyektə, o cümlədən 27 yaşayış binasına ziyan dəyib”, – deyə o bildirib.