ABŞ-nin tələbləri qəbul edilmədi | Mən ölkəmizi sata bilmərəm

Ukrayna Prezidenti Volodimir Zelenksi sülh danışıqlarının gündəmdə olduğu bir vaxtda ABŞ tərəfinin tələblərini ciddi qəbul etmədiyini açıqlayıb.

Volodimir Zelenksi Ukrayna Ordusunun kifayət qədər güclü olduğunu bildirib:

“Biz Avropanın ən möhkəm ordusuna sahibik. Bu güc bizə digər tərəfdaşlarla, yəni müttəfiq və ya düşmənlərlə bərabər səviyyədə danışmaq imkanını yaradır. Düşünürəm ki, ilk növbədə mübarizə apardığımız tərəflərə baxmalıyıq. Rusiyanın bütün güzəştləri ilə razılaşmaq qərarını əhalinin yalnız 1 %-i dəstəkləyir. Bizim cavabımız budur.

Mən Ukraynanı müdafiə edirəm. Ölkəmizi sata bilmərəm. Hər şey bu qədər sadədir. Mən onlara hətta təklif də etdim. Siz bizə təminat verin, biz də qarşılıqlı razılaşma əsasında memorandum imzalayaq. Lakin mənə çox böyük rəqəmlər təqdim etdilər. Təbii ki, “yox” cavabını verdim. Bu məsələ ilə bağlı hüquqşünaslar məşğul olsunlar. Mən bu sənədlərin detallarına toxunmayacağam.

Ümumi olaraq isə ABŞ bizə təxminən 60 milyard hərbi yardım və daha 31,5 milyard maddi dəstək verib. Biz bütün bunlar üçün minnətdarıq. Lakin istənilən halda bu rəqəm 500 milyard ola bilməz. “Bütün bunlar 500 milyarda başa gəldi, ona görə də bizə bu məbləği qaytarın” kimi tələbin qarşımıza qoyulması absurddur. Mən bunu ciddi hesab etmirəm”.

Xatırladaq ki, bu, Kiyev liderinin ilk belə çıxışı deyil. V.Zelenski son günlər verdiyi açıqlamaları ilə həm ABŞ, həm də Rusiya tərəfinin istəkləri ilə razılaşmadığını bildirib.