Almaniya kansleri Aİ ölkələrinə çağırış etdi

“Avropa İttifaqına üzv dövlətlər və digər ölkələr Ukraynaya daha çox yardım etməlidir, çünki Almaniya bu cür ağır yükü təkbaşına daşıya bilməz”.

Bu sözləri Almaniya kansleri Olaf Şolts deyib. O bildirib ki, Ukraynaya göndərilən yardımların ümumi həcmində Almaniyanın payı həddindən çoxdur. Bu isə ədalətli deyil.

“Bizim töhfəmiz olmalıdır, amma başqa dövlətlər də bunu etməyə maraqlı olmalıdırlar”, – deyə O.Şolts bildirib.

Kansler Aİ-nin 1 fevralda keçiriləcək sammitində Kiyevə yardım göstərməklə bağlı yükün bölüşdürülməsi məsələsini qaldıracağını bildirib. “Ukraynadakı münaqişədə həlledici məqam artıq çatıb. Burada hər kəsin payı eyni səviyyədə olmalıdır”, – deyə Almaniya kansleri əlavə edib.

O.Şolts xatırladıb ki, Berlin 2024-cü ildə Ukraynaya dəstək üçün 7 milyard avrodan çox vəsait ayıracaq ki, bu da Aİ ölkələrinin bütün yardımlarının yarısından çoxunu təşkil edəcək. Onun sözlərinə görə, əgər Rusiya Avropa dövlətlərinin Kiyevin daima yanında olduğu mesajını alsa, sülh o zaman tez olacaq.