Atəşkəs əldə olunsa da, fələstinliləri narahat edən problemlər qalıb

HƏMAS ilə İsrail arasındakı atəşkəs razılaşmasının üzərindən bir ay vaxt keçib. Lakin Qəzza zolağında vəziyyət müsbətə doğru dəyişmir. İnsanlar hələ də çadırlarda həyatlarını davam etdirməyə çalışırlar.

“Qəzzanın taleyi Allahın əlindədir. Başqa necə ola bilər ki?! Qəzza məhv edilib. Burada heç nə yoxdur. Vəziyyət çox pisdir. Biz yaxşı münasibət görmək istəyirik. Digər ölkələrin yanımızda olmaqlarını istəyirik. Lakin onlar yalnız baxmaqla məşğuldurlar. Biz vəziyyətin yaxşılaşmasını və humanitar yardımın çatdırılmasını tələb edirik. Çadırlardan çıxıb evlərimizə qayıtmağın arzusundayıq. Biz normal insan kimi sülh içində yaşamaq istəyirik”, – deyə Qəzza sakini Xitam Hədayed bildirib.

Qeyd edək ki, Qəzzada ümidlər artıq tükənir. Humanitar vəziyyət isə dalana dirənib. 2 milyondan çox insanın evini itirməsinin fonunda Qəzza sakinləri lazımi dəstəyi və humanitar yardımı almırlar. İsraillə atəşkəsə görə gündəlik 600 yük maşını Qəzza zolağına yardım daşımalıdır. Lakin bu vəd yerinə yetirilmir. İsrail tərəfi isə buna görə HƏMAS-ı günahlandırır.