Atom enerjisi üzrə beynəlxalq agentlik İrana görə zəmanət verəcək?

Atom Enerjisi üzrə Beynəlxalq Agentlik etibarlı yoxlama sistemi vasitəsilə İranda nüvə silahının hazırlanmayacağına zəmanət verə bilər.

Bunu Atom Enerjisi üzrə Beynəlxalq Təşkilatın baş direktoru Rafael Qrossi İran və İsrail arasında gərginliyin artması ilə bağlı BMT Təhlükəsizlik Şurasının təcili iclasında bildirib.

“Lazımi siyasi iradə olduqda diplomatik həll mümkündür. Sazişin elementləri müzakirə olunub və Atom Enerjisi üzrə Beynəlxalq Təşkilatı etibarlı yoxlama sistemi vasitəsilə İranda nüvə silahının hazırlanmayacağına zəmanət verə bilər. Bu, Yaxın Şərqdə sülh gətirəcək və nüvə böhranının qarşısını alacaq uzunmüddətli sazişin əsası ola bilər”, − deyə o vurğulayıb.

Rafael Qrossi əlavə edib ki, Buşehr nüvə stansiyasına hücum regional fəlakətə yol aça bilər.

“Son bir neçə saat ərzində region ölkələri birbaşa olaraq mənimlə əlaqəyə keçərək narahatlıqlarını dilə gətiriblər. Mən bir məsələni tamamilə aydın şəkildə demək istəyirəm: Buşehr nüvə obyektinə hücum yüksək miqdarda radioaktivliyin yayılmasına gətirib çıxaracaq”, − deyə R.Qrossi BMT Təhlükəsizlik Şurasındakı çıxışında bildirib.