Avropa Birliyi Rusiyaya qarşı Orta Asiya dövlətlərinə möhtacdır

“Cəmi dörd il əvvəl Mərkəzi Asiya bir az kənarda qalmışdı, indi isə hadisələrin mərkəzindədir və Avropa Birliyi onlarla tərəfdaşlığı gücləndirmək istəyir”.

Bunu Avropa Birliyi diplomatiyasının rəhbəri Cozep Borrel Brüsseldə keçirilən AB-Mərkəzi Asiya Forumunda çıxışında deyib.

“Mövcud mürəkkəb geosiyasi şəraitdə Mərkəzi Asiya AB üçün əsas tərəfdaşa çevrilir. Anti-Rusiya sanksiyalarının effektivliyinə nail olmaq üçün Brüsselə, ilk növbədə, bu region ölkələri ilə tərəfdaşlıq lazımdır.

Prinsiplərini qorumaq üçün AB Rusiyaya qarşı sanksiyalar tətbiq etdi. Amma Ukraynada döyüşlər şiddətlənir və biz tunelin sonunda işığı görmürük. Sanksiyaların effektiv olması üçün bizim tərəfdaşlarımızla tam əməkdaşlığa ehtiyacımız var.

Biz AB, Mərkəzi Asiya ölkələri və Rusiya arasında ticarəti diqqətlə izləyirik, sanksiyalarımızdan yan keçməyə imkan verən mexanizmi təhlil etməyə çalışırıq və bu sahədə əməkdaşlığımızı artırmalıyıq. Çünki qlobal çağırışlarla üzləşmək üçün beynəlxalq tərəfdaşlığa ehtiyacımız var”, – C.Borrel bildirib.

Qeyd edək ki, Brüsseldə keçirilən AB-Mərkəzi Asiya Forumunda Qazaxıstan, Özbəkistan, Qırğızıstan, Türmənistan və Tacikistan nümayəndələri iştirak ediblər.