“Bu, Rusiyanın məqsədyönlü zərbəsidir” | Ukrayna Energetika Nazirliyindən təcili məlumat

Rusiya Ukraynanın qaz nəqli infrastruktur obyektinə hücum edib.

Bu barədə "Report" Ukraynanın Energetika Nazirliyinə istinadən xəbər verib.

Bildirilib ki, avqustun 6-sı gecə saatlarında Rusiya Ukraynanın Qaz Nəqli Sisteminin operatorunun Odessa vilayətində, Ukrayna-Rumıniya sərhədi yaxınlığında yerləşən kompressor stansiyasına məqsədyönlü hücum həyata keçirib. Hücum onlarla pilotsuz uçuş aparatı vasitəsilə edilib.

Bu stansiya Yunanıstanın mayeləşdirilmiş təbii qaz terminallarını Trans-Balkan qaz kəməri vasitəsilə Ukraynanın qaz anbarları ilə birləşdirən marşrut çərçivəsində istifadə edilirdi. ABŞ-dən mayeləşdirilmiş təbii qaz və Azərbaycan qazının sınaq həcmləri bu yolla təchiz edilirdi.

"Bu, Rusiyanın mülki infrastruktura, energetikaya, eyni zamanda Azərbaycan, ABŞ və Avropadakı tərəfdaşlarla münasibətlərə, ukraynalıların və bütün avropalıların normal həyatına qarşı məqsədyönlü zərbəsidir", ‒ Ukraynanın Energetika Nazirliyinin məlumatında qeyd olunub.

Zərbə endirilən yerdə mütəxəssislər hücumun nəticələrini müəyyən etmək üzərində işləyirlər.