“Cəbhədə əsas təhlükə...” | Xarkovun meri gizli planı “Baku TV”yə danışdı

Xarkov şəhəri yenə Rusiya Ordusunun hədəfinə çevrilib.

Sumıda bufer zona yaratmağa cəhd edən Rusiya Ordusunun Xarkov planları da oxşardır.

Xarkov şəhərinin meri İqor Terexov, o cümlədən Ukrayna Silahlı Qüvvələrinin Xarkov vilayəti üzrə rəsmisi Pavlo Şamşin itkilər və yeni hücumlar barədə Baku TV-nin Şərqi Avropa bürosuna danışıblar.

İ.Terexovun sözlərinə görə, hücumlar gah güclənir, gah da zəifləyir:

“Hər gün partlayışlar olur, dağıntılar qeydə alınır. Təxminən 10 milyon dollar ziyan dəyib. Dağılan binaları bəpa etmək olur, amma ölən insanları heç kim geri həyata qaytara bilməz. 3 ildə Xarkovda 12 mindən çox mülki obyekt dağıdılıb və ya zədələnib. Bunlardan 9500-ü yaşayış binalarıdır. Xarkov şəhərinin 160 min sakini mənzillərindən, öz evlərindən məhrum olub”.

Ukrayna Silahlı Qüvvələrinin Xarkov vilayəti üzrə rəsmisi Pavlo Şamşin isə bildirib ki, Xarkov vilayətində ən qaynar nöqtə Volçansk və onun ətrafıdır:

“Rusiya bu istiqamətdə hərbi əməliyyatları artırır. Bizim hərbçiləri Volçya çayının cənub sahilinə sıxışdırmaq istəyirlər, amma alınmır. Buna görə son vaxtlar Volçanskı cinahlardan keçməyə çalışırlar. Dvureçnaya qəsəbəsində də vəziyyət mürəkkəb olaraq qalır. Rusiya öz hərbçilərini Oskol çayının qərb sahilinə köçürməyə davam edir. Məqsəd sağ sahildən Kupyansk şəhəri üçün təhlükə yaratmaqdır. Onlar Kupyanskı mühasirəyə almağa çalışırlar”.

Onun sözlərinə görə, Rusiya kiçik hərbi qruplaşmalar vasitəsilə hücum edir. Bu taktika ilə Rusiya hərbçiləri gizli formada Ukrayna mövqelərinə soxulmağa çalışır:

“Əvvəllər Rusiya Ordusu hücumlarda əsasən artilleriyadan istifadə edirdisə, hazırda dronlara üstünlük verir. Tamamilə müxtəlif tipli dronlardan istifadə olunur. 2022, 2023 və 2024-cü illərin eyni dövrü ilə müqayisə etsək, indi dronlar cəbhədə əsas təhlükəyə çevrilib”.

Xarkov şəhərinin meri İqor Terexov onu da bildirib ki, Hava Hücumundan Müdafiə sistemlərinə ehtiyac var.