Gürcüstanda mədənçilərin etirazı Tbilisiyə qədər çatdı

Gürcüstanda mədənçilərin etiraz aksiyaları günlərdir ki, davam edir.

İmereti bölgəsinin Çiatura şəhərindən olan etirazçıların bir qismi artıq aksiyalarını paytaxt Tbilisidə davam etdirirlər.

Maaş artımı, eləcə də iş şəraitinin və təhlükəsizliyin yaxşılaşdırılmasını tələb edən mədənçilər mərkəzi Rustaveli prospektindəki Parlament binasının qarşısında çadırlar qurublar. Etirazçılardan biri gözlərini, biri isə ağzını tikdirib. Bir qrup mədənçi isə günlərdir ki, aclıq aksiyası keçirir.

Qeyd edək ki, aksiyalara paytaxt sakinləri, gənclər, eləcə də hüquq müdafiəçiləri qoşulublar. Mədənçilərə dəstək nümayiş etdirmək üçün aksiyada iştirak edən vəkil Baia Pataraia Baku TV-yə verdiyi müsahibəsində bu etirazın tamamilə haqlı olduğunu bildirib.

“Onlar yalnız maaşla bağlı tələblərini irəli sürmür, həmçinin ekologiyanın qorunması üçün də mübarizə aparırlar. Hazırda Çiaturada vəziyyət olduqca gərgindir. Manqanın əldə edilməsinin daha təhlükəsiz üsulları da mövcuddur. İşlərin hazırkı qaydada davam etməsi insan sağlamlığı üçün təhlükəlidir. Bu baxımdan mədənçilərin etirazları tamamilə haqlıdır”, – deyə o qeyd edib.

Aksiya səbəbi ilə əraziyə çox sayda polis və hüquq-mühafizə orqanlarının əməkdaşları cəlb olunub. Havanın yağışlı keçməsinə baxmayaraq, etirazlar axşam saatlarında da davam edib.