Yeni Kaledoniyada aksiya zamanı həlak olanların sayı artdı | Vəziyyət gərginləşir

Yeni Kaledoniyada baş verən kütləvi etirazlar zamanı ölənlərin sayı 6 nəfərə çatıb.

Bu barədə xarici mətbuatda məlumat verilib.

Bildirilib ki, arxipelaqın şimal hissəsindəki şəhərlərdən birində atışma zamanı daha bir nəfər ölüb. Bununla da etiraz aksiyalarında ölənlərin sayı 6-ya çatıb. Həmçinin qeyd olunub ki, iki nəfər yaralanıb. Zərərçəkənlər yerli xəstəxanaya çatdırılıb.

Baş verənlərin fonunda Fransa Ali Şurası toplaşaraq adada hərbi vəziyyət elan edib. Adaya çox sayda hərbçi, polis, jandarma qüvvələri və xüsusi xidmət orqanlarının əməkdaşları göndərilib. Yüzlərlə etirazçı həbs edilib, bütün nümayiş və aksiyalar, eləcə də sosial şəbəkələr qadağan edilərək bağlanılıb. Jurnalistlərin adaya girişi məhdudlaşdırılıb.

Bundan əlavə, Fransaya qarşı keçirilən etirazlar başlayandan bəri 200-ə yaxın insan saxlanılıb. Fransa Prokurorluğu Yeni Kaledoniyada bir neçə gün davam etmiş etiraz aksiyaları ilə bağlı araşdırmalara başlayıb.

Qeyd edək ki, Fransanın koloniyası olan Yeni Kaledoniya Fransadan 16 min kilometr aralıda – Sakit Okeanda, Avstraliya qitəsinin yaxınlığında yerləşir. Bu uzun məsafəyə baxmayaraq, Fransa adanı koloniyasına çevirib istismar edir ki, bu da yerli əhali tərəfindən etirazla qarşılanır.