“İran rejimi SSRİ deyil, amma...” | Tarix təkrarlanır?

“İran rejimi SSRİ deyil və ya 2025-ci ildəki vəziyyət 1989-cu ildəki kimi deyil. Tarix təkrarlanmır, amma əks-səda verir. Unutmamalıyıq ki, biz SSRİ-nin məğlubedilməz hesab edildiyi bir dövrdə böyümüşük”.

Bunu amerikalı analitik Mark Dubovits deyib.

M.Dubovits Tehran rejiminin bəzi sosial məsələlərdə yumşalmasını Mixail Qorbaçovun SSRİ-ni xilas etmək üçün başladığı məhdud islahatlara bənzədib, bu islahatlar sistemin çöküşü ilə bitdi.

Analitik bildirib ki, İsrail hələ də bölgədəki əsas düşmənini – İranı məhv etməkdə qərarlıdır:

“Uzun illərdən sonra İran rejiminin devrilməsi İsrail strategiyasının əsas məsələlərindən birinə çevrilib. Məncə, 7 oktyabr hadisələri hər şeyi dəyişdi. Artıq onlar deyirlər: biz İran İslam Respublikası ilə yaşaya bilmərik, Xamenei bizi məhv etmək ideyasına sadiqdir”.

Bununla belə, M.Dubovits əlavə edib ki, “rejim dəyişikliyi” termini Vaşinqtonda populyar deyil:

“İraq və Əfqanıstan təcrübələrinə görə bu ifadəni xoşlamırıq. Vaşinqtonda heç kim 500 min ABŞ əsgərini İrana hücuma göndərməkdən danışmır. Bu gün müzakirə olunan “Reyqan strategiyası”dır ‒ Ronald Reyqanın 1980-ci illərdə uğurla tətbiq etdiyi metod: rejim müxaliflərinə maksimum dəstək və rejimə maksimal təzyiq”.