İranla "Avropa üçlüyü" arasında görüş keçirildi

İyunun 20-si Cenevrədə İranla "Avropa üçlüyü" arasında danışıqlar keçirilib.

İranın xarici işlər naziri Abbas Əraqçi Yaxın Şərqdə vəziyyətin gərginləşməsi fonunda Böyük Britaniya, Fransa və Almaniya ilə danışıqlar aparıb.

O, çıxışı zamanı ölkələrin nümayəndələri ilə danışıqlara işarə edərək bildirib ki, İran raket arsenalı məsələsi ilə bağlı heç kimlə danışıqlar aparmır.

Onun sözlərinə görə, Cenevrədəki bu görüş nüvə məsələsi ilə bağlıdır.

“Bizim dinc məqsədlər üçün nəzərdə tutulmuş nüvə obyektlərimiz MAQATE-nin tam nəzarəti altında olmasına baxmayaraq, hücuma məruz qalıb. İsrailin nüvə obyektlərinə hücumları ağır hərbi cinayətlərdir. Bizim ərazi bütövlüyümüzü, milli suverenliyimizi və təhlükəsizliyimizi bütün gücümüzlə müdafiə etmək kimi haqqımız var. Bu, Nizamnamənin 51-ci maddəsi ilə də açıq şəkildə tanındığı kimi, bizim ayrılmaz hüququmuzdur”, − nazir əlavə edib.

Abbas Əraqçi vurğulayıb ki, İsrailin hücumu diplomatiyaya xəyanət olub. Bu səbəbdən iyunun 15-də amerikalılarla nüvə proqramımı ilə bağlı planlaşdırılan görüş baş tutmayıb.