İsraildən Qəzzaya ardıcıl zərbələr: 9 BMT əməkdaşı həlak oldu

HƏMAS-ın raket hücumlarına cavab olaraq İsrailin Qəzza zolağını bombardman etməsi nəticəsində BMT-nin Fələstinli Qaçqınlara Yardım Agentliyinin əməkdaşları həlak olub.

Bu barədə Agentliyin kommunikasiyalar üzrə direktoru Culiet Tuma “Associated Press”ə açıqlamasında bildirib.

Onun sözlərinə görə, Qəzzada Agentliyin 9 əməkdaşı həlak olub. Qeyd edilib ki, onlar yaşadıqları binanın İsrail təyyarələri tərəfindən bombardman edilməsi nəticəsində həyatlarını itiriblər.

“Münaqişə zamanı mülki şəxslərin müdafiəsi hər şeydən vacibdir. Onlar müharibə qanunlarına uyğun olaraq qorunmalıdır”, – deyə Agentlik rəsmisi öz açıqlamasında bildirib.

C.Tuma əlavə edib ki, BMT-nin Fələstinli Qaçqınlara Yardım Agentliyinin sığınacağına çevrilmiş 18 məktəb aviazərbələr nəticəsində zədələnib və qurumun Qəzzadakı qərargahı da ciddi zərər görüb.