İsveçrədə kritik görüş: Vaşinqton və Tehranın texniki heyətləri yenidən toplanır - Baku TV

"İsrail və ABŞ-nin Yaxın Şərqdəki digər müttəfiqləri Prezident Donald Trampın İranla atəşkəs sazişindəki "qırmızı xətlər"indən xəbərdardırlar".

Bunu Küveytdə səfərdə olan ABŞ dövlət katibi Marko Rubio jurnalistlərə bildirib.

O, İsrailin Vaşinqton və Tehran arasındakı razılaşmanı pozmağa çalışdığını təkzib edib:

"Bu məlumatı haradan aldığınızı bilmirəm. Hansı nəşrlərə istinad etdiyinizi də bilmirəm. Biz bunun üzərində işləyirik. Bölgədəki bütün tərəfdaşlarımız, o cümlədən İsraillilər bizim nə üzərində işlədiyimizi dəqiq bilirlər. Hamı Prezidentin bu məsələ ilə bağlı "qırmızı xətlər"inin və mövqeyinin nə olduğunu başa düşür".

Dövlət katibi həmçinin qeyd edib ki, ABŞ və İranın texniki qruplarının məsləhətləşmələri iyunun 30-da davam edəcək.

"Texniki qrup, xatırladığım qədəri ilə, bu danışıqları davam etdirmək üçün iyunun 30-da yenidən toplanacaq. Onlar müxtəlif məsələlərlə məşğul olan işçi qruplarına bölünüblər”, – deyə Rubio əlavə edib.

Bu arada, İran Xarici İşlər Nazirliyinin sözçüsü İsmayıl Bəqai "ABŞ ilə müttəfiqlərinin Yaxın Şərqə hərbi müdaxiləsi davam etdikcə regionda sülh və sabitlik bərqərar olmayacaq" deyə "X" sosial şəbəkə hesabında yazıb. Bəqai bunu ABŞ dövlət katibi Marko Rubionun sözlərinə cavab olaraq bildirib.

Xatırladaq ki, Rubio regiondakı sülh və sabitliyin həssaslığını Tehrana bağlı proksi qüvvələrin fəaliyyəti ilə əlaqələndirib.

"İranın proksi qüvvələri İraqdan raketlər və dronlar buraxdığı, HƏMAS-ın, eləcə də "Hizbullah"ın terrorçuluqda iştirak etdiyi müddətcə regionda düşmənçiliyin və münaqişələrin sona çatmasına nail ola bilməzsiniz", – deyə o, açıqlama vermişdi.