Kimlər "TikTok"a girə bilməyəcək? - Əsl səbəb açıqlandı
“TikTok” ABŞ-də qadağan edilə bilər. Konqresdə bununla bağlı qanun layihəsi hazırlanıb.
Ağ Ev sözügedən qanun layihəsini dəstəkləyir. Bu barədə Ağ Evin mətbuat katibi Karine Jan-Pyer məlumat verib.
O bildirib ki, qanun layihəsi “TikTok” proqramına tamamilə qadağa qoymur.
“Biz bu qanun layihəsini çox vacib hesab edirik. Konkret problemi həll etmək üçün hazırkı səylərdə bu addımı dəstəkləyirik. Söhbət tam qadağadan getmir. Sadəcə proqramın bizə zərər verə biləcək şəxslər üçün bloklanmasını istəyirik”, – deyə o bildirib.
Konqresmenlər sənədi yekunlaşdırdıqdan sonra ABŞ Prezidenti Co Bayden onu imzalamaq niyyətindədir.
Qeyd edək ki, Nümayəndələr Palatası “TikTok” sosial media platformasının Çinin texnologiya şirkəti “ByteDance” ilə əlaqəli olacağı halda şəbəkənin ölkə ərazisində qadağan edilməsini nəzərdə tutan qanun layihəsi hazırlayıblar. Hesab olunur ki, Çin rəsmiləri və kəşfiyyat xidmətləri bu şəbəkə vasitəsilə məlumat əldə edə bilərlər.