Konqoda yeni virusdan ölənlərin sayında artım | Fövqəladə vəziyyət elan edildi

Konqoda meymunçiçəyi epidemiyası yayılmaqda davam edir.

Bu il adıçəkilən ölkədə meymunçiçəyi xəstələrinin sayı 15 mini keçib, 500-dən çox insan dünyasını dəyişib.

Bu barədə ölkənin səhiyyə naziri Samuel Rocer Kamba məlumat verib. Nazir əlavə edib ki, virusa yoluxan xəstələr ölkənin bütün 26 əyalətində müəyyən olunub.

Qeyd edək ki, Afrikada meymunçiçəyinin yayılması ilə bağlı səhiyyə sahəsində fövqəladə vəziyyət elan olunub.

Bu arada, bir neçə Afrika ölkəsində yayılan meymunçiçəyi virusunun daha yoluxucu variantına ilk yoluxma halı İsveçdə qeydə alınıb. Bildirilib ki, bu, Afrika qitəsindən kənarda diaqnoz qoyulan ilk hadisədir. Xəstə virusa Afrikanın böyük epidemiya olduğu bölgələrindən birində yoluxub. Həmin şəxs Stokholm xəstəxanasına kömək üçün müraciət edib. Həkimlər onun meymunçiçəyi virusunun daha yoluxucu variantına yoluxduğunu təsdiqləyiblər.