Putin ilin sonuna qədər Donbası işğal etmək istəyir?

Rusiya Silahlı Qüvvələri Donetsk vilayətindəki Yarovaya qəsəbəsinə zərbə endirib.

Hadisə nəticəsində ən azı 20 nəfər həlak olub.

Ukrayna Prezidenti Volodimir Zelenski “Telegram” səhifəsində hadisə ilə bağlı yazıb ki, dünya Rusiyanın bu zərbələrinə lazımi reaksiya verməlidir.

“Rusiyanın bu cür zərbələri reaksiyasız qalmamalıdır. Onlar həm həyatı məhv etməyə davam edir, həm də yeni sanksiyalardan yayınırlar. Dünya səssiz qalmamalıdır. Hərəkətə keçmək lazımdır. ABŞ reaksiya verməlidir. Avropanın etirazına ehtiyac var. G20 də susmamalıdır. Elə addım atmaq lazımdır ki, ölüm maşınına çevrilən Rusiya dayandırılsın”, – deyə Volodimir Zelenski bildirib.

Bundan başqa, V.Zelenski “ABC News”a müsahibəsində qeyd edib ki, Vladimir Putin ilin sonuna qədər Donbası işğal etmək istəyir, bu, Rusiyaya iki və ya üç milyon insanın həyatı bahasına başa gələcək.

“V.Putin amerikalılara, Ağ Evə və Prezident Donald Trampın nümayəndəsi Stiven Uitkoffa Donbası ilin sonuna qədər maksimum iki-üç ayda alacağını söyləyib”, – deyə V.Zelenski bildirib.

Kiyev rəhbəri informasiyanın mənbəyini açıqlamayıb.