Rusiya dronlarla Ukraynaya hücum etdi

Ukraynada gedən müharibə son günlər intensiv qarşılıqlı hücumlarla müşahidə olunur. Ölkənin, demək olar ki, bütün şəhərləri son bir aydır daha çox kütləvi dron hücumlarına məruz qalır.

Ukrayna Müdafiə Nazirliyinin açıqlamasına görə, müharibə başlayandan bugünədək rekord sayda dron hücumu sentyabrda qeydə alınıb. Belə ki, ay ərzində 550-dən çox dron Ukrayna üzərinə buraxılıb.

Ukrayna Hərbi Hava Qüvvələri Komandanlığının ictimaiyyətlə əlaqələr idarəsinin rəisi Yuri İqnat vəziyyəti belə şərh edib: “Bu ilin sentyabrında Ukraynaya qarşı rekord sayda Pilotsuz Uçuş Aparatlarından istifadə edilib. Buraya İran istehsalı olan “Shahed”, Rusiyanın istehsal etdiyi “Lanset”, “Kub” dronları daxildir. Güman ki, Ukraynaya bundan sonra PUA-lar vasitəsilə hücumların sayı daha da artacaq. Rusiya bu aparatları müxtəlif istiqamətlərdə buraxır. Odur ki, bu təhdidlərə adekvat şəkildə reaksiya vermək lazımdır. Əlbəttə ki, bu PUA-ları daha ucuz başa gələn metodlarla vurmağa çalışmalıyıq.

PUA hücumlarının sayı artsa da, bizdə raketlər elə də çox deyil. Bu gün bizə həm “Buk M-1”, “S-300” kimi zenit-raket kompleksləri, həm də “Patriot”, NASAMS və s. Qərb ölkələrinin istehsal etdiyi zenit-raket kompleksləri tədarük olunur. Hazırda bu tədarüklərdən asılıyıq. Buna görə də PUA-ları, məsələn, “Gepard” zenit-raket kompleksləri və ya Sovet dönəminə aid digər sistemlər və ya yeni, perspektivli vasitələrlə məhv etmək lazımdır".

"Bu gün Ukraynada silah çeşidi səviyyəsi çox yüksəkdir. Hazırda dünyanın heç bir ölkəsi Ukrayna kimi müxtəlif zenit-raket komplekslərinə malik deyil. Sadəcə indi Ukraynada bu sistemlərin sayı çox deyil. F-16 qırıcılarının tədarükünü də gözləyirik. Bu döyüş təyyarələri bizim ölkəmizin hava məkanını qoruyacaq”, – deyə o qeyd edib.

Yuri İqnatın sözlərinə görə, qışa doğru Ukraynaya şimaldan da yeni kəskin hücumların olacağı gözlənilir.