Son qərarı ABŞ, yoxsa İsrail verəcək? | Təl-Əvivin Tehranda əsas hədəfləri

İsrailin Baş naziri Benyamin Netanyahu, müdafiə naziri Yoav Qallant və digər nazirlər İrana endiriləcək cavab zərbəsinin vaxtı və üsulu ilə bağlı planı hazırlayıblar.

Bu barədə məlumat B.Netanyahunun baş ofisinə istinadən yayılıb.

Bildirilib ki, razılaşma oktyabrın 15-nə keçən gecə keçirilən müşavirədə əldə olunub. Mənbə onu da qeyd edib ki, İranın raket hücumuna İsrailin cavabı milli maraqlarına əsasən baş tutacaq.

B.Netanyahu isə öz növbəsində qeyd edib ki, ABŞ-ni dinləyəcək, lakin son qərarı özü verəcək. İlkin hədəflərin hara olacağı açıqlanmasa da, haraları vurmayacaqlarını açıq-aşkar bildiriblər.

B.Netanyahu ABŞ-yə nüvə və ya neft obyektlərini deyil, İrandakı hərbi obyektləri hədəf almağa hazır olduğunu bildirdiyini dilə gətirib.

Xatırladaq ki, İran oktyabrın 1-də İsrailə 200-ə yaxın ballistik raket atıb. İsrail Ordusunun verdiyi məlumata görə, onların əksəriyyəti havada ikən zərərsizləşdirilib.

Analitiklər isə hesab edirlər ki, İranın neft obyektlərinə vurulan zərbə neft qiymətlərinin artımına gətirib çıxaracaq ki, bu da dünyanın heç bir ölkəsinin işinə yaramır. Ona görə də İsrail belə addımdan yayınacaq.