Ukrayna Ordusundan ağır zərbə | Rusiya 1020 əsgərini itirdi

Rusiya-Ukrayna müharibəsi davam edir. Ən qaynar nöqtə isə Donetsk vilayətinin Pokrovsk rayonudur.

Döyüşlərin çoxu Pokrovskda qeydə alınıb. Ümumilikdə isə cəbhə xətti boyunca 170 hərbi toqquşma baş verib.

Ukrayna Silahlı Qüvvələrinin Baş Qərargahından verilən məlumata görə, sutka ərzində döyüşlərdə Rusiya Ordusunun 1020 hərbi qulluqçusu məhv edilib. Rusiya Ordusuna aid hərbi texnika da sıradan çıxarılıb.

Rusiya Ordusu Odessa vilayətinə pilotsuz uçuş aparatları ilə hücum edib. Nəticədə enerji və nəqliyyat infrastrukturları zədələnib. Bir dinc sakin yaralanlıb.

Ukrayna Ordusu da Rusiyaya dron hücumu təşkil edib. Rusiya Müdafiə Nazirliyinin məlumatına görə, 37 PUA zərərsizləşdirilib. Dronlar Krım, Saratov, Orlov, Lipetsk, Rostov, Bryansk, Kaluqa, Voronej və Qara dəniz üzərində vurulub.

Rusiyalı pilota “Kinjal” raketi ilə təchiz olunan “Miq-31” qırıcı təyyarəsinin qaçırılması üçün ukraynalı agent tərəfindən 3 milyon dollar təklif olunub. Federal Təhlükəsizlik Xidməti bununla bağlı səs yazısı paylaşıb. Onun Rusiyadan köçürülməsi və təhlükəsizliyinin təminatı da vəd edilib.