Ukraynanın məğlubiyyəti ABŞ-yə baha başa gələcək | Kiyevə hansı yardım ediləcək?

ABŞ Prezidenti Donald Trampın ictimai şəkildə Ukraynaya hərbi yardımın dayandırılmasına çağırış etməsinə baxmayaraq, onun administrasiyası Ukrayna Silahlı Qüvvələrinə əsas kəşfiyyat, o cümlədən peyk məlumatlarının və uzaqmənzilli zərbələr üçün vacib hədəflərin koordinatlarının ötürülməsini dayandırmağı planlaşdırmır.

Bu barədə “Foreign Policy” nəşri Vaşinqtondakı mənbələrinə istinadən yazıb.

Qeyd olunur ki, Ukraynada hələ də Trampın fikrini dəyişəcəyinə və ölkəyə daha çox yardım edəcəyinə ümid edirlər. Lakin məqalənin müəllifləri daha real ssenari kimi Trampın diplomatik proseslərdə fəallıqdan imtina edəcəyini və ABŞ silahlarının Kiyevə tədarükünü dayandıracağını ehtimal edirlər. Bununla belə, Tramp administrasiyasının Ukraynadan tamamilə imtina etməyəcəyi də vurğulanır.

“Amerikalı siyasətçilər – onların arasında əksəriyyət respublikaçılardır – anlayırlar ki, Ukraynanın mümkün məğlubiyyətindən Vaşinqton çox şey itirə bilər. ABŞ əvvəlki dəstəyə bənzər təkliflər verməyə qadirdir və yəqin ki, bunu edəcək, əgər bu, Vaşinqton üçün çox baha başa gəlməzsə...”, – deyə məqalədə bildirilir.

Vaşinqtondakı insayderlər deyirlər ki, Tramp administrasiyası Ukraynanın ABŞ-nin peyk kəşfiyyatına çıxışını dayandırmayacaq. Bu məlumatlar dəqiq zərbələrin endirilməsi üçün həlledici əhəmiyyət daşıyır və Amerika peykləri Ukrayna Silahlı Qüvvələrinin “gözləri və qulaqları” adlandırılır.